John 8

moórá-ininko óꞋon-kwaasiye máyon-kwasai.

1Óríve-omapaꞋa Ísu uména 2aaváyaavimba kuména anóm-bonoꞋ-naumpaꞋa umáyowasa kwaásiyomba kwenópaꞋa torupowaná maraꞋá ména kwenáái simátimuwasa 3ámáámba sun-kwáásíyé ámáán-kawaa-kwaasiye aaraí áíꞋmaesa minínínkó óꞋon-kwaasiye máyomba pósa áíꞋmai amáparawai túrankaꞋa ankésa 4Ísuntavesa sésa anóndakoo minínímbá óꞋon-kwaasiye máyáísata awánéta tátoꞋmai áíꞋmaeta túne. 5ámáán-auvaivimba Mósesi agaimaréna séna mirámó índawaimba óntandei tuvúwónanaya puwíníye agaimaréna siráiye. nóran-imayaa éwa seénó sésa 6Ísumba maka sésa mirá senaná paárínata kwembá aaivimbá mayankánáe sésa suwaná Ísu kívairena ayáánauviꞋnei mararáꞋá aúvái agaimarówasa 7áísaa aisaa uwaná usásinena simátimena séna imó sáwíꞋo uráindawai aivar-óntámbá maimé tuvuwíno simátimena 8moórágwaraꞋa kívairena ayáánauviꞋnei mararáꞋá aúvái agaimarówasa 9isésa moórá-mora-kwaasi kunákárúwasowana anón-kwaasi aivaꞋá kumúwasa miwán-ánaaemba kwaꞋmaésa kúmúwana minínínkówé suꞋmai Ísuwe máyowana 10usásinena áísaa ena séna náávara máyaao. amáparawai íma aaivimbá mayankánááoo súwana 11owé íma aaivimbá maisinkánááowe súwana kegwáráꞋá íma aaivimbá mayankáúna kómpo moórágwaraꞋa íma mirán-uwo Ísu siráiye.

kwaási sáma kamátinkainaꞋa úne Ísu siráin-kwasai.

12ókwaraꞋa Ísu kwenáái simátimena séna kwaási sáma kamátinkainaꞋa úne. kesínaaembo kwaráíyawai íma tunínívo sáma kamái maíꞋmaiꞋa ónááowe súwasa 13ámáán-kawaa-kwaasi sésa eyáá ená ááimba séndamanivo íma áraiꞋa kwésene suwaná 14Ísu séna ímanivo kesááigona ááimba áraiꞋa kwésune. áꞋa awánáúndavakemba kunkáundayavai áꞋa awánáúndavaꞋa iyónaunda póꞋa kemá súnda-aimba áraiꞋa kwésune. kesí ááimba íma suwánaraawe. 15marapá-kwáásí kentí imáyáavinkemba aaimá maisínkaavo kemá íma aaimá kwémaitinkaumne. 16kemó aaimó maitinkáundarakai arupí úsino. íma kewé suꞋmai aaivimbá maitinkánaumpo kesé kesivoé aaivimbá maitinkáyauye. miráumai kemó aaimó maitinkáundarakai arupí úsino. 17kentí ámáán-auvaivimba agaimaréna séna kae-kwáásíráí moórá-aimbo séyambo ékai mináímbá áraiꞋa kwéseye agaimaréna siráiye. 18miráumai kemá kesáváí simátimunana kesivoé kesé mimbórá-áímbá simátimuyamba póna árair-aimban-iye súwasa 19enavomá náávara máyáiyo áísaa esa suwaná kesí ááimbo ímo suwánaantavai kesivombá íma kwéawanaawe. kesí ááimbo suwánaankakenkai kesivombá awánaasino Ísu súmba 20anóm-bonoꞋ-naumpaꞋa óntambo túwón-daumpaꞋa mináímbá simátimuwasa tátoranae sésa suwááesa kwená kanaamá íma túntavesa íma tátokaawe.

21minkákémbá Ísu simátimena séna tiyuwéꞋa íyónaꞋa sivakáá uwááeꞋa íma suwánanaaowe. puwíyamba kentí sáwí-imayaa kwáyáinaꞋa puwónááowe. íyóndavaꞋa íma kanaán-umai iyónááowe súwasa 22Yútaa-anon-kwaasi sésa kwemá séna íyóndavaꞋa íma kanaán-umai iyónááowe simbá póna kweyááríkara puwíndayavena siíyo suwaná 23Ísu séna keinárawaꞋa maankákén-kwáásímán-ovo kemá sanaankéndáꞋá úne. keinárawaꞋa marapákén-kwáásímán-ovo kemá kwíyómpakendaꞋa úne. 24simátimeꞋa séꞋa puwíyamba kentí sáwí-imayaa kwáyáinaꞋa puwónááowe. kemá kwíyómpakendaꞋa úmpo kentávéꞋo ímo áraire séꞋo éꞋa kentí sáwí-imayaa kwáyáinaꞋa puwónááowe súwasa 25mináínkóná ááimba íma ísámai áísaa esa sésa nááwawa oónó suwaná Ísu séna aasiyaasi-táwai áꞋa simátímakaumne. 26keinárawataveꞋa sáwívar-aimba kanaán-umai séꞋa aaivimbá maitinkáundanivo siꞋmákaiwaina aaiyé suꞋmai amáparawaiyaveꞋa kwésimatimune. kwemó arupí iwáín-áái kwésimatimune súwasa 27Áánútun-aaima súmbanivo íma ísówana 28mindáyavai Ísu séna kemá kwaási úrandaꞋa kumpaáruraundawai síꞋmaeꞋa taairaꞋá mói sínkamonaaomba póꞋa suwánéꞋa séꞋa kwemó siwáímá kwená imáyáavinkemba íma sivo avowamá simámakain-aimpinkemba siráiye mirá sénááowe. 29siꞋmákaiwai aamoí ínkwáe-iꞋa úmae kwéiyunda póna íma siyuwéna kesé máyáiye súwasa 30sáwíva-kwaasi isésa kwentávésa áraiꞋa kwíyómpakendaꞋan-iye siráawe.

tátokaawanamo Ísu ayútínkáin-kwasai.

31Ísuma Yútaa-anon-kwaasi kwentávésa áraiꞋa kwíyómpakendaꞋa iyémó sirówaiyavena séna kesááimo ísámaimo kaweꞋó éꞋo éꞋa kesí kwaási aúꞋmái ménaaowe. 32árair-aimba íséwana tátokaiyampinkemba mináráír-áínkó ayútinkaniye súwasa 33Ááváramun-andaraken-kwaasi únda póta íma óꞋon-kwaasi tátokaawe. nóra se ayútinkaniye seénó suwaná 34Ísu séna áraiꞋa simátimeꞋa séꞋa sáwíꞋo kwéowaima misáwíkómá kembá kwétatoraiye. kesí mayáí úwoi mayáígwáe sésa meéyámbaꞋmai tátokaantenkaan-kwaasin-owe. 35mirán-kwáásí kawáánákóná naaúmpaꞋa íma maíꞋmaiꞋa ónááovo kwenáánimbaaꞋa maíꞋmaiꞋa ónááowe. 36kemó Áánútu ááninkomo ayútínkáanaꞋo éꞋa ayútuweꞋa ménaaowe. 37Ááváramun-andaraken-kwaasi ombánivo kesáái íma tirumpimbá kwáyáintaveꞋa tuvuwónáe kwésewe. 38kesivo agaráásínkáin-aimba kwésumpo kentivomá simátímín-aimba kwésewe súwasa 39Ááváramu kentáásivoman-iye suwaná Ááváramun-andarakewaimo ékai Ááváramumo úntemba mirá uráasino. 40Áánútu árair-aimba simásímakaimba simátimundanivo tuvuwónáe kwésewe. Ááváramu íma mirá uráivo 41kentivomó uráintemba mirá kwéowe súwasa kesáámá íma kesinóma eénkwááírákémbá kentáá masínkaraiye. kentáásivoma mimbóráwáí Áánútuman-iye suwaná 42Áánútunopakemba kunkáunda póꞋa Áánútu árááꞋo ékai kentirumbá simésino. íma kesí imáyáavinkemba kunkáumpo kwemá siꞋmáráísaꞋa kunkáumne. 43kemó súnda nóra séra íma kwéisaao. kesááigo umbaí kwétiyaiye. 44kemá Sáátáánigo árááꞋa póꞋa kwenarááíma kwaránáe kwésewe. kwemá ááinkakemba tuvúkáiwaiman-iye. áraiꞋo sií-yántááꞋá íma kwempímbá kwáyáísana kampaꞋnaampar-áínkómá avowaíꞋa kwéiye. 45miráumai árair-aimba simátimundayavai árair-aimba iyémá íma kwésewe. 46íma sáwíꞋa uráunda kwéisaawe. arupí-aimba simátimunaꞋanivo íma áraire kwésewe. 47Áánútu árááꞋa pósa kwenáái isésa máyáavo keinárawaꞋa íma Áánútu árááꞋmaariꞋa uréꞋa póꞋa kwenáái íma ísaraawe Ísu siráiye.

48Ísu simásuwowasa Yútaa-anon-kwaasi akáꞋáámba simánkesa sésa áraiꞋa séta Sámériyaa-kwaasi ónana taraváá-kwámbá enarumpimbá máyáísampo mináímbá siráane suwaná 49Ísu séna taraváá-kwámbá íma kesirumpimbá máyáiye. kesivo áwíꞋa anómba úndanivo kesúwíꞋa sáwíꞋa umásínkáawe. 50íma kesúwíꞋa anómba ónáe. Áánútu kentávéna séna kaweꞋ-máyáí mayáánda póꞋa enáwíꞋa mósá anómba umánkanaumne kwésiye. 51áraiꞋo senda-áímbá kesáái ísámai kaweꞋá íyawai íma puwónááowe súwasa 52Yútaa-anon-kwaasi sésa sénda-aimba taraváá-kwámbó enarumpimbó máyáimba áta ísaraumne. Ááváramu puwúwasa Áánútun-aai simátímakowaima púwúmbanivo emá se kesáái ísámai kaweꞋá íyawai íma puwónááowe siráane. 53kentáásivo Ááváramu puwúwasa Áánútun-aai simátímakowaima pukáambanivo miwí usáyaaitaniyono. emó sénda náávakendaraꞋono suwaná 54Ísu séna kesúwíꞋo mósá maráúndarakai úwoi úsina. kesúwíꞋo mósá maránímba kesivomán-iye. kwentávéꞋa séꞋa kentáásí Ísóigoman-iye kwésewe. 55kwembá kwéawanaumpo kemá íma awánaraawe. kemó séꞋo íma awánáúmnemo súndarakai kemó ontembá kampaꞋnáꞋá maúsino. áꞋa kwéawaneꞋa póꞋa kwenáái mósá kwémaraumne. 56kentivo Ááváramu kemó marapáꞋó kumónaunda-aimba iséna aamoí éna kembá suwánéna kwenarunkó kaweꞋá uráiye súwasa 57Yútaa-anon-kwaasi sésa emá ívé-kwaasi íma kae-kwááí umái siyáánkai-ima maisukáampo emá séma Ááváramumba awánaraumnewa seénó suwaná 58áraiꞋa simátimeꞋa séꞋa Ááváramumbo ímo maránkaronkaꞋa kemá maémaundaniye súwasa 59mináíntáváí tuvuwónáe sésa óntamba máyómbanivo Ísu aúpáꞋá anóm-bonoꞋ-naumpakemba kárúwaguraiye.